यीशु ह फिर ले जी उठिस

सैनिक मन के दूवारा, यीसु ल कुरूस म चढाय के बाद अविसवासी यहूदी नेता मन पिलातुस के पास आके कहिन | ओ भरमोइया यीसु हर जब ओहा जीयत रहिस त कहत रहिस कि “मैं तीन दिन के बाद म जी उठिहां |” कोनो मन ल ओ कबर के रखवारी करना चाही ताकि ओकर चेला मन आकर ओकर सरीर ल झन चोरा ले जायं अउ ओकर बाद म कह दिहीं कि ओहा मुर्दा म से जी उठे हे |”    

पिलातुस हर कहिस “कुछ सैनिक मन ले के जावव अउ अपन समझ के अनुसार रखवारी करव |” एकर सेती ओमन, कबर के द्वार के पथरा म मोहर ल लगाके अउ सैनिक मन के पहरा लगाइन कि कोई मन भी सरीर ल झन चोरा सकयं |   

यीसु ल दफ़नाय के दिन के बाद सबत के दिन रहिस, यहूदी याजकमन यीसु के कबर म जाय बर कोई ल भी अनुमति नइ दीन | सबत के दिन के बाद आघू दिन बिहनियां कई झन माई लोगमन यीसु के सरीर म सुगन्धित पदारथ ल डारे बर ओकर कबर अंगत जाय बर तैयार होईन |     

अचानक एक बड़े जानिक भूकम्प होईस | काबर कि परभू के दूत हर सरग ले उतरिस, ओकर रूप हर बिजली के जइसन अउ ओकर कपड़ा हर पोनी के समान उज्जर रहिस | ओहर कबर के पथरा ल जउन हर कबर के द्वार म लगे रहिस हटा दीस अउ ओकरे ऊपर म बैठ गीस, कबर के रखवारी करने वाला रखवार मन काँप गीन अउ मरे मुरदा के समान हो गीन |      

जब माई लोग मन कबर म पहुचीन, सरगदूत ह ओ माईलोग मन ल कहिस “झन डरावव | यीसु हर इहां नइ ये, परन्तु अपन वचन के अनुसार जी उठे हे |” आवा, ये जगह ल देखव |” त ओ माईलोग मन कबर म जे करा यीसु ल रखे गेय रहिस देखिन | ओकर सरीर हर ओ करा नइ रहिस |       

तब सरगदूत हर ओ माईलोग मन ल कहिस, “जावा अउ तुरते जाके ओकर चेला मन ल कहा कि यीसु हर मरे हुए म से जी उठे हे अउ ओहा तुमन से पहिली गलील देश जाही |”

ओ माईलोग मन डरा गीन अउ बहुत आनन्द से भर गीन | ओमन छेला मन अंगत ये बड़े आनन्द के समाचार ल देय बर दौड़ गीन |

जब ओ माईलोग मन चेला मन ल ये आनन्द के समाचार ल सुनाय बर जात रहिन त डाहर म ओमन ल यीसु हर दिखाई दीस, ओमन ओकर आराधना करिन | तब यीसु हर ओमन ल कहिस “झन डराव | मोर चेला मन ल जाके कहव कि ओमन गलील चल देवयं, उहाँ ओमन मोला देखउ पाहीं |”

बाइबिल की ये कहानी लेय गे हे : मती 27 : 62-28 : 15 ; मरकुस 16 : 1-11 ;लूका 24 : 1-12 ; यहून्ना 20 : 1-18